Saúdo da alcaldesa

É agosto e, con el, chegan os días máis esperados do ano para todos os betanceiros e betanceiras. As Festas Patronais de San Roque volven converter Betanzos nun espazo de encontro, de alegría e de convivencia, onde tradición e modernidade camiñan da man para ofrecer unha programación pensada para todas as idades e todos os gustos.

Ao longo destas semanas, a nosa cidade énchese de vida. A música, a cultura, o deporte, o folclore, o teatro, as exposicións, as actividades infantís e os grandes espectáculos compartirán protagonismo cos símbolos que nos identifican e que forman parte da nosa historia: os Caneiros, o Globo de San Roque, as nosas danzas gremiais…

A nosa pregoeira, Dolores Vázquez, abrirá oficialmente unhas festas que serán tamén unha homenaxe aos valores da dignidade, da fortaleza e da capacidade para superar as dificultades. Será, sen dúbida, un dos momentos máis emocionantes deste San Roque.

Betanzos é, un ano máis, un dos grandes referentes do verán galego. Abrimos as nosas portas con orgullo para recibir a milleiros de persoas que nos visitan, convidándoas a descubrir unha cidade acolledora, chea de historia, patrimonio e tradición, pero tamén viva, dinámica e con ilusión de futuro.

Invítovos a vivir intensamente cada un dos actos programados. A encher as prazas, a compartir os concertos, a animar as competicións deportivas, a participar nas actividades culturais e a manter vivas as tradicións que herdamos de xeración en xeración. Porque as festas constrúense entre todos e todas, e cada sorriso, cada encontro e cada momento compartido fan máis grande Betanzos.

Fago un chamamento á responsabilidade e ao respecto. Gocemos destas festas desde a convivencia, o civismo e a igualdade, para que todos poidamos gozar dunhas celebracións seguras, inclusivas e libres de calquera tipo de violencia.

Quero trasladar o meu agradecemento ás asociacións, entidades culturais e deportivas, patrocinadores, corpos e forzas de seguridade, Protección Civil, persoal municipal e a todas as persoas que, coa súa dedicación e compromiso, contribúen a que cada edición sexa un éxito.

Agardo que estas Festas de San Roque 2026 deixen en cada un de vós recordos inesquecibles e momentos para compartir coa familia e cos amigos.

Vivamos as nosas festas con entusiasmo, coa emoción de sempre e co orgullo de ser betanceiros e betanceiras.

Boas festas e feliz San Roque!